Ég kynntist seitan í Svíþjóð og mér fannst það ótrúlega spennandi viðbót inní vegan matarmenningu. Nú hefur Ella Stína flutt inn lífrænt seitan fyrir okkur Íslendinga að kynnast. Þú getur notað það í raun hverskonar rétti í stað kjöts/kjötlíkis eða notað eins og þú myndir nota tófú eða baunir. Seitan er úr hveitiglúteni og er mjög próteinríkt.

Í Svíþjóð kynntumst við sænskum kókoskúlum sem fást í öllum verslunum þar. Þær urðu staðalbúnaður um helgar og hægt var að kaupa þær stakar eða í kassa með 6 eða 12 stykkjum. Við getum sagt að við byrjuðum pent með eina á mann sem varði stutt og vorum við fljótlega komin í 6 stykkja kassann og það kom fyrir að sá stóri rataði í kerruna. Við buðum öllum sem komu í heimsókn til okkar uppá “Delicatoboll”. Þeir eru dæmi um svona vinsælt nammi/bakkelsi sem er óvart vegan. En þeir voru auðvitað stútfullir af sykri og smjörlíki. Kaffið í þeim er sennilega það sem gefur þeim sitt einkennandi bragð en þrátt fyrir kaffibragðið þá eru kúlurnar/boltarnir vinsælir hjá börnum og ég sem drekk ekki kaffi, og hef aldrei gert, elska þá.